Plani për ta shndërruar këtë fshat në një destinacion turistik të ardhshëm…
Zymi i Hasit është një fshat i vjetër i krahinës së Hasit, në komunën e Prizrenit, Kosovë. Ky është një fshat që ruan me kujdes të gjallë kujtesën historike dhe identitetin e tij unik. Së fundmi, në platformën për konsultime me publikun, u publikua Plani i Menaxhimit për Fshatin Zym i Hasit.
Ky dokument strategjik ka për qëllim krijimin e kushteve të nevojshme për ruajtjen, promovimin dhe menaxhimin e duhur të fshatit Zym, si një pasuri të çmuar të trashëgimisë kulturore nën mbrojtje të përkohshme.
Dokumenti është fryti i një procesi gjithëpërfshirës, të zhvilluar në kuadër të projektit ‘Integrimi i Trashëgimisë Kulturore në Planifikimin Hapësinor’. Projekti financohet nga Ministria e Kulturës, Rinisë dhe Sportit dhe zbatohet nga UN-Habitat Kosova, përmes Programit për Zhvillim Gjithëpërfshirës, të financuar nga Qeveria e Suedisë.
Fshatrat e kësaj zone (Zym i Hasit, Karashëngjergji dhe Bregdriu) posedojnë një vlerë estetike të brendshme, të lidhur ngushtë me arkitekturën vernakulare që i karakterizon ndërtesat, me skenarin natyror mbresëlënës që i rrethon, si dhe me pasurinë e pasur të trashëgimisë kulturore dhe historike.
Theksi kryesor i këtij plani do të vihet tek fshati Zym i Hasit dhe vlerat e tij të shumëllojshme të trashëgimisë kulturore, të cilat përbëjnë një potencial të madh për ta shndërruar këtë fshat në një destinacion turistik të ardhshëm.
Përmes një qasjeje të integruar dhe ndërdisiplinore, synohet ruajtja dhe mbrojtja e kësaj zone me interes kombëtar. Zymi i Hasit synon të konsolidohet si një model referencë i trashëgimisë shpirtërore, jo vetëm në nivel kombëtar por edhe ndërkombëtar, duke u dalluar për mënyrën unike se si e ruan dhe e përcjell identitetin e tij kulturor.
