Rrëfen historinë e rrallë për “Diasporën Hasjane” Arberie Rada
Arberie Rada njihet nga të gjithë si vajza nga Hasi që theu tabun duke u bërë e para femër në
postin e drejtues të policisë bashkiake në Shqipëri, e aq më tepër në një zonë të vështirë që
shquhet për zotërim të këtyre pozicioneve drejtuese nga meshkujt. Në një intervistë për
“Diasporën Hasjane”, Arberie Rada ka rrëfyer të gjithë rrugëtimin e saj, nga arsimimi e deri tek
postet e njëpasnjëshme në punë të ndryshme.
“Unë jam Arberie Rada, e lindur dhe e rritur në Krumë-Has (1999), në një familje modeste
dhe të respektuar në Has. Ndryshe prej motrave dhe vëllezërve të mi, unë zgjodha të jetoj në
Shqipëri, saktësisht në Has. U rrita me frymë dashurie ndaj shkollës dhe arsimin e lartë e
ndoqa në Tiranë për Bachelor në Sociologji dhe Master në Administrim në Sistemin e
Drejtësisë, Kriminalistikë. Jam trajnuar për Oficere Sigurie (në shkolla) pranë Akademisë së
Sigurisë, Tiranë.”
Pas studimeve, përkundër mundësive të mira të punës në Tiranë, e reja zgjodhi të kthehet në Has.
“Gjatë kohës që mbarova studimet, isha në mëdyshje ku të rri: në Tiranë apo Has. Dhe pse me
shumë opsione të mira pune në Tiranë, zgjodha Hasin. Këtu u gjenda me një papunsi të
thelluar. Pavarësisht kësaj, kjo nuk më ndaloi, por futa në mendje planin B, që aktualisht e
posedoj si punë të dytë. Hapa një minibiznes katering për dekore surpriza me lule natyrale, gjë
që i mungonte Hasit. Tani, prej 4 vitesh, minibiznesi u zhvillua dhe aktualisht kam hapur
dyqan fizik dhe është rritur në Biznes Familjar (ARDO EVENT).” – shprehet e reja.
Pasi punoi si Oficere Sigurie, Arberie Rada u prezantua me një sfidë të re: emërimi si
Kryeinspektore e Policisë Bashkiake të Hasit, duke thyer një tabu si gruaja e parë në këtë
pozicion në Shqipëri. Pavarësisht heshtjeve fillestare, ajo u prit mirë nga stafi dhe komuniteti,
dhe e percepton veten si të lumtur për këtë hap të suksesshëm.
“Në atë kohë, m’u ofrua puna si Oficere e Sigurisë në shkolla. Doja që të ushtroja arsimin tim
dhe afro 150 km larg çdo ditë (Has-Tropojë), afro 1 vit kam punuar si Oficere Sigurie pranë
shkollës “Asim Vokshi” (2022-2023). E vështirë dhe shumë sfiduese. Deri sa një ditë përballa me një ofertë tjetër pune dhe u terhoqa në Bashkinë Has. Pas disa muajsh, unë mora
pozicionin e Kryeinspektores në Policinë Bashkiake të Hasit. Isha tepër e ngazëlluar dhe
dyshuar nëse duhet ta zgjedhja këtë vend pune?! A është mirë apo keq?! Isha pak nëpër
mjegull se si do ta priste komuniteti, sepse ishte thyerje e një tabu. Mund të them se isha e
para femër si drejtuese e policisë bashkiake në gjithë Shqipërinë. Më pas kuptova se kam bërë
zgjedhjen e duhur! U prita shumë mirë nga stafi i policisë bashkiake dhe nga komuniteti. Tani
që po e praktikoj, jam tepër e lumtur.”- shprehet Rada.
Nga angazhimi i saj në komunitet, ajo ka arritur të shërbejë njëkohësisht si Drejtore e Mbrojtjes
Civile, ku përgjigjet për emergjencat dhe sigurinë, dhe si koordinatore e KVSP-së dhe KVR-së,
duke punuar për të mundësuar të rinjësh përmes projekteve, duke i ofruar këto pozita një përvojë
të vlefshme zhvillimi profesional dhe personal.
“Nga puna efektive dhe komunikimi me banorët e Hasit, unë mora pozicionin Drejtore e
Mbrojtjes Civile. Gjithashtu, me votë të lirë, jam zgjedhur koordinatore e KVSP-së (Komisioni
Vendor i Sigurisë Publike), jam Koordinatore e KVR-së (Këshilli Vendor Rinor), ku jam
marrë me shumë grupe të rinjësh, duke u dhënë mundësi zbatimi për idetë dhe projektet e tyre
nëpërmjet shumë shoqatave dhe organizatave, si kombëtare ashtu edhe ndërkombëtare.”
Ajo aktualisht ushtron me përkushtim detyrat në Drejtorinë e Mbrojtjes Civile, duke u përgjigjur
për rregullat sociale, emergjencat civile, mbrojtjen e territorit dhe monitorimin e zjarreve, ku
përvoja e përditshme e forcon dhe e zhvillon si profesioniste, duke e ndier veten të bekuar nga
prania gjithnjë e më e madhe e grave në role tradicionisht të dominuara nga meshkujt në Has.
“Aktualisht ushtroj me shumë zell dhe përkushtim punën time në Drejtorinë e Mbrojtjes
Civile, ku kam të bëj me rregullat dhe qetësinë sociale, ku kam të bëj me emergjencat civile,
mbrojtjen e territorit si dhe monitorimin e zjarreve dhe shpëtimit. Çdo ditë ka dinamika të reja
që mua, si element femër, më forcojnë dhe më zhvillojnë për jetën. Jam tepër e bekuar që në
Has elemente femër po marrin pozicione ku janë dominuar nga meshkujt.”
Ajo thekson se “ne mundemi” me përkushtim, vendoshmëri dhe punë, duke kuptuar se Hasi ka
pasur, ka dhe do të ketë pasuri që kanë nevojë për pasqyrim.
