Nën drejtimin e parë femëror, ansambli shkëlqen në skenën kombëtare dhe ndërkombëtare, duke u bërë ambasadore e denjë e trashëgimisë hasjane.
Hasi, djep i një jete kulturore të gjallë dhe të pasur, e mbushur me tradita që trashëgohen me kujdes brez pas brezi. Në zemër të kësaj treve, folklori, kënga dhe vallja hasjane ruhen me fanatizim, duke u shfaqur në festivale, koncerte dhe një mori aktivitetesh. Në këtë peizazh kulturor plot energji, Ansambli “Pjetër Bogdani” i Hasit shquhet si një nga yjet më të shkëlqyer.
Që nga shtatori i vitit 2023, ansambli drejtohet për herë të parë nga një femër, Zonja Flutura Aliaj, duke shënuar kështu një moment historik për jetën kulturore të rajonit. Nën drejtimin e saj të pasionuar dhe të përqendruar, ansambli ka pësuar një metamorfozë të shpejtë, duke arritur rezultate të shkëlqyera dhe duke u nderuar vazhdimisht me çmime prestigjioze.
Viti 2024 vazhdoi me ritëm të pamposhtur. Në maj, ansambli fitoi Vendin e Parë dhe çmimin “Malësori” në festivalin “Hasi Jehon” në Gjonaj, Kosovë. Këtij suksesi iu shtua në mars 2025 edhe çmimi “Qyteti North Star” në Festivalin me të njëjtë emër në Dibër.
Vera e 2025 solli një buqetë të re fitoresh. Në gusht, ansambli u nderua me vendin e parë në Festivalin Folklorik Tipologjik të Valleve në Lushnjë. Kulmi i arritjeve erdhi në shtator të vitit 2025, në Festivalin “Zani i Kombit” në Komoran, Kosovë, ku “Pjetër Bogdani” pushtoi skenën duke u vlerësuar me tre çmime të mëdha: “Grupi më i kompletuar”, “Instrumentisti më i mirë” (për Perparim Brati) dhe “Interpretuesja më e mirë” (për Fahrie Tutaj).
Një moment veçanërisht i rëndësishëm ishte realizimi i “Dasmës Hasjane” në gusht, një projekt ambicioz ku u prezantuan në mënyrë të gjallë të gjitha ritet dhe zakonet tradicionale të trevës. Këto arritje të shumëfishta e kanë shndërruar Ansamblin “Pjetër Bogdani” në një ambasador të denjë të kulturës hasjane dhe të trashëgimisë kombëtare. Për të gjitha këto suksese, ka pasur një mbështetje të vazhdueshme nga qeverisja vendore, Bashkia Has, me punën e palodhur të grupit të punës dhe sponsorë të ndryshëm.
NISMAT E REJA
Energjia kulturore në Has nuk ndalet. Po lindin projekte të reja me synim të thelluar ruajtjen dhe promovimin e traditave. Ndër risitë më premtuese është “Dita e Mërgimtarëve”, e kushtuar diasporës hasjane, që është pjesë e pandashme e identitetit të rajonit.
Një projekt tjetër madhor është “Dasma Hasjane”, e cila synohet të futet në listën e UNESCO-s si pasuri kulturore jomateriale. Po ashtu, parashikohet një shfaqje e kësaj dasme në Londër, qyteti ku jeton pjesa më e madhe e diasporës hasjane.
Një simbol tjetër i krenarisë kombëtare që po përgatitet për vitin e ardhshëm është “Festa e Plisit”. Krahas këtyre aktiviteteve, janë në plan edhe projekte të rëndësishme të infrastrukturës kulturore, si rindërtimi i muzeut të ish-Internatit dhe rikonstruksioni i kullave tradicionale, të cilat përfaqësojnë një pjesë të çmuar të trashëgimisë historike të krahinës.
Për t’i bërë të gjitha këto nisma realitet dhe për t’i dhënë Hasit vendin që meriton në hartën kulturore kombëtare dhe ndërkombëtare, kërkohet mbështetje e plotë financiare, si nga qeveria qendrore ashtu edhe nga partnerë dhe donatorë të ndryshëm.
