Në Ditën e Mësuesit, 7 Mars, gjimnazi më verior i Shqipërisë shkëlqen me kushte bashkëkohore, duke u radhitur ndër 10 shkollat më të mira në vend
Në zemër të qytetit të Krumës, gjimnazi “Skënderbeu” qëndron sot si një simbol i transformimit të arsimit shqiptar. Pikërisht në 7 Mars, kur i gjithë kombi nderon sakrificën e mësuesve dhe kujton hapjen e Mësonjëtores së parë shqipe në Korçë më 1887, ky institucion arsimor në Has feston një rilindje të veten: një rikonstruksion të plotë që i ka dhënë shkollës fytyrën e një qendre moderne evropiane.
Pas më shumë se 25 vitesh pa investime, godina e ndërtuar në vitin 1970 tashmë është transformuar rrënjësisht. Në janar të 2026, 450 nxënës dhe 39 anëtarë të stafit pedagogjik u ulën në klasat e reja dhe laboratorë të pajisur me teknologjinë e fundit. Një godinë trekatëshe prej 1800 metrash katrorë, e shoqëruar nga një palestër 670 m2 dhe terrene sportive prej 500 m2, ofron tani kushtet e duhura për një proces mësimor dinjitoz.
Por ajo që e bën këtë histori të veçantë nuk është vetëm ndërhyrja e shtetit shqiptar përmes Ministrisë së Arsimit. Drejtori i shkollës, z. Besim Dani, i cili e drejton këtë institucion që nga viti 2022, tregon se transformimi erdhi falë një kombinimi të qeverisjes qendrore dhe iniciativave të fituara nga vetë shkolla. “Kur mora detyrën në 2022, mungonin kushtet elementare: tavolina, karrige, dritare të tëra,” rrëfen ai.Por me këmbëngulje, përmes projekteve dhe bashkëpunimeve, gjimnazi arriti të pajiset me dy laboratorë digjitalë, laboratorë të shkencave (fizikë, kimi, biologji), bibliotekë, qendër rinore, madje edhe një muze dhe një kinema.
Një nga momentet më të rëndësishme ishte bashkëpunimi me organizatën “Perspektiva të Reja”, e mbështetur nga qeveria britanike, që solli dy salla moderne kushtuar këshillimit të karrierës. Ndërsa projekti “Up Shift” i dhuroi shkollës një hapësirë rinore argëtuese, duke e kthyer gjimnazin në një qendër komuniteti për të rinjtë e Hasit.
Por një shkollë nuk janë vetëm muret dhe laboratorët. Ajo është fryma e njerëzve që e mbushin atë. Në prag të 7 Marsit, z. Dani nuk kursen fjalët e mira për stafin e tij prej 39 mësuesish, të cilët, sipas tij, “reflektojnë mirësi, përkushtim e vlera, pavarësisht sfidave të kohës”. Pikërisht përkushtimi i tyre, bashkë me infrastrukturën e re, e ka ngjitur gjimnazin “Skënderbeu” në majat e arsimit shqiptar – ai radhitet tashmë ndër 10 gjimnazet më të mira në vend.
Në një zonë si Hasi, që ka njohur emigracion të konsiderueshëm, kjo arritje merr një rëndësi të veçantë. Shkolla po kthehet në një spirancë shprese për të rinjtë, duke iu ofruar atyre mundësi për t’u zhvilluar pa qenë nevoja të kërkojnë larg vendlindjes. Aktivitetet e shumta sportive, kulturore dhe artistike, së bashku me mësimin interaktiv në laboratorë, synojnë të formojnë breza të aftë për tregun e punës dhe sfidat e kohës.
Në këtë 7 Mars, mesazhi i drejtorit Dani vjen i qartë për nxënësit, prindërit dhe të gjithë kontribuuesit e arsimit në Has: “Gëzuar Ditën e Mësuesit! Mirënjohje dhe respekt pafund për çdo mësues që me djersën e tij ndërton të ardhmen.” Dhe ndërsa në të gjithë Shqipërinë kremtohet hapja e Mësonjëtores së parë, në Krumë, një shkollë e re tregon se rruga e dijes vijon e pandalshme, edhe në cepin më verior të vendit.
