Nënkryetari i “Diasporës Hasjane”, z. Max (Misin) Dajci, ndan vizionin e tij për forcimin e komunitetit, ruajtjen e identitetit hasjan, angazhimin e brezit të ri dhe rolin që diaspora mund të luajë në zhvillimin e Hasit, duke e kthyer solidaritetin në veprime konkrete në shërbim të njerëzve.
Pas çdo organizimi të suksesshëm, çdo nisme humanitare dhe çdo aktiviteti që afron hasjanët me njëri-tjetrin, qëndron puna e njerëzve që e shohin shërbimin ndaj komunitetit si mision. Njëri prej tyre është nënkryetari i “Diasporës Hasjane”, z. Max (Misin) Dajci, i cili e konsideron këtë përgjegjësi jo si një detyrë, por si një privilegj dhe një obligim moral ndaj vendlindjes dhe njerëzve të saj.
Për z. Dajci, angazhimi në drejtimin e “Diasporës Hasjane” mbart një domethënie të veçantë.
“Është një përgjegjësi e madhe morale dhe një privilegj të vendosësh veten në shërbim të komunitetit tënd.”
Ky është edhe parimi që ka udhëhequr angazhimin e tij gjatë këtij viti, një periudhë e mbushur me iniciativa që kanë forcuar lidhjet mes hasjanëve dhe kanë dëshmuar se diaspora mund të jetë një forcë e rëndësishme zhvillimi dhe solidariteti.
Sipas tij, lidhja e hasjanëve me vendlindjen nuk është krijuar nga rrethanat, por buron natyrshëm nga identiteti dhe trashëgimia e tyre.
“Lidhja me vendlindjen është diçka natyrale që vjen nga shpirti. Ajo ushqehet nga respekti i ndërsjellë mes anëtarëve të komunitetit dhe nga vlerat e larta që kemi trashëguar brez pas brezi.”
Këto vlera vazhdojnë të jenë forca që mban të bashkuar komunitetin.
“Sinqeriteti, ndershmëria, mikpritja dhe vullneti për të ndihmuar njëri-tjetrin.”
Një vend të rëndësishëm në vizionin e tij zë brezi i ri. Ai beson se të rinjtë do ta çojnë përpara misionin e “Diasporës Hasjane”, duke e zhvilluar edhe më tej atë.
“Brezi i ri do të ketë një të ardhme më të mirë se brezi ynë. Ata do të kenë një shtëpi të përbashkët dhe jam i bindur se do ta çojnë përpara këtë shoqatë, duke e forcuar dhe zhvilluar për brezat që do të vijnë.”
Megjithatë, ai thekson se kjo kërkon investim dhe mbështetje konkrete për të rinjtë.
“Të rinjtë e Hasit kanë nevojë për mbështetje që ta ndërtojnë të ardhmen e tyre në vendlindje.”
Për ta bërë këtë të mundur, ai sheh potencial të madh në zhvillimin e turizmit dhe në krijimin e mundësive të reja për punësim.
“Turizmi dhe potenciali turistik i zonës mbeten ende të pashfrytëzuara. Gjithashtu, trajnimi i të rinjve për punësim online do t’u krijonte mundësi që, duke pasur kualifikimet e duhura, të jetojnë në natyrën e bukur të Hasit dhe njëkohësisht të punojnë në tregun global.”
Kur flet për momentet më të rëndësishme të këtij viti, z. Dajci ndalet te dy ngjarje që, sipas tij, pasqyrojnë më së miri frymën e “Diasporës Hasjane”.
“Për të qenë më realist janë dy momente. Një nga momentet më domethënëse ishte realizimi i tubimit të parë gjithëpërfshirës i datës 30 nëntor 2025, ku brezi i ri, lindur dhe rritur në Britani, tregoi me shumë pasion dashurinë për rrënjët e tyre dhe u ndien më shqiptar se kurrë.”
Po aq i rëndësishëm ishte edhe dimensioni humanitar i këtij organizimi.
“I dyti, mundësimi i furnizimit me karroca lëvizëse për një pjesë të komunitetit tonë, që u realizua falë këtij tubimi. Gjatë takimeve me disa prej përfituesve kuptova se, pavarësisht sfidave që përballojnë, ata janë ndër njerëzit më të mrekullueshëm dhe frymëzues të komunitetit tonë.”
Për nënkryetarin e “Diasporës Hasjane”, kontributi i diasporës nuk kufizohet vetëm në organizimin e aktiviteteve, por shtrihet në ruajtjen e identitetit dhe krijimin e lidhjeve të qëndrueshme mes komunitetit dhe vendlindjes.
“Në ruajtjen e identitetit kombëtar, në integrimin e komunitetit tonë në shoqërinë britanike, si dhe në krijimin e urave lidhëse mes komuniteteve tona dhe vendlindjes.”
Kur e përfytyron Hasin e së ardhmes, ai sheh një vend ku trashëgimia dhe zhvillimi ecin krah për krah.
“E përfytyroj Hasin si një shtëpi të madhe për gjithë komunitetin tonë, një trashëgimi e ruajtur dhe e zhvilluar brez pas brezi.”
Forca që e motivon në këtë rrugëtim mbetet dëshira për të bërë mirë dhe për t’i shërbyer njerëzve.
“Dëshira për të pasur një komunitet të bashkuar dhe dëshira për të ndryshuar, qoftë edhe sadopak, jetën e atyre që kanë më shumë nevojë.”
Në përmbyllje, ai përcjell një mesazh që përmbledh filozofinë mbi të cilën është ndërtuar edhe misioni i “Diasporës Hasjane”.
“Duhet të jemi sa më të bashkuar, të ndihmojmë njëri-tjetrin dhe të jemi shembull i mirë në shoqëritë ku jetojmë. Le të kontribuojmë me krenari në vendet ku jetojmë, duke mos harruar kurrë rrënjët dhe vendlindjen tonë.”
Ky vizion e shndërron “Diasporën Hasjane” në më shumë sesa një organizatë. Ajo është një familje e madhe që ruan identitetin, forcon lidhjet mes brezave dhe e kthen solidaritetin në vepra konkrete. Në këtë rrugëtim, kontributi i nënkryetarit z. Max (Misin) Dajci është dëshmi se përkushtimi ndaj komunitetit nuk matet vetëm me fjalë, por me punën e përditshme, me përgjegjësinë e marrë përsipër dhe me dëshirën për t’i lënë brezave një “Diasporë Hasjane” edhe më të fortë, më të bashkuar dhe më pranë Hasit.
