Sa po zbatohet projekti “Perspektiva të Reja”?
Rajonet veriore të Shqipërisë, me në krye Qarkun e Kukësit dhe Bashkinë Dibër, përballen me një nga sfidat më komplekse ekonomike dhe demografike të vendit. Kukësi vazhdon të mbajë një statistikë të rëndë: është një nga rajonet më të varfëra ekonomikisht në Shqipëri dhe në Europë. Ekonomia lokale ka regjistruar rënie të vazhdueshme, duke thelluar një situatë tashmë shumë të vështirë.
Në këto zona, duke përfshirë edhe krahinat përreth si Hasi dhe Tropoja, niveli i ulët i arsimimit dhe i trajnimit profesional, i kombinuar me mungesën akute të mundësive në tregun e punës, i lë shumicën e qytetarëve në pamundësi për të gjetur punë të qëndrueshme. Si pasojë, perspektivat e të rinjve për të ardhmen e tyre janë kryesisht pesimiste, investimet janë të pakta, ekonomia informale mbizotëron, dhe norma e migracionit, si brenda vendit ashtu edhe jashtë, është shumë e lartë.
Migrimi masiv, veçanërisht në mënyrë të parregullt drejt Britanisë së Madhe, është bërë një normë kulturore e pranuar. Kjo “rrjedhje truri” e dobëson më tej çdo përpjekje për sipërmarrje dhe aktivitet të ri ekonomik, duke e lënë rajonin pa fuqinë intelektuale dhe punëtore për të përparuar.
“PERSPEKTIVA TË REJA”: NJË PËRGJIGJE RAJONALE E PËRQENDRUAR
Pikërisht për t’iu përgjigjur këtyre sfidave komplekse në shkallë rajonale, u lançua projekti “Perspektiva të Reja”. Ky projekt, i financuar nga Qeveria e Mbretërisë së Bashkuar dhe i zbatuar nga Swisscontact në konsorcium me TAG International, synon të krijojë një ekosistem të ri ekonomik dhe sipërmarrës për të gjithë veriun. Qëllimi përfundimtar është transformimi i këtyre zonave nga zona të dëshpëruara në qendra të mundësive, duke i bërë ato vende ku njerëzit, veçanërisht të rinjtë, duan të jetojnë dhe të investojnë.
NJË SULM NË TRE FRONTE PËR ZHVILLIM
“Perspektiva të Reja” operon nëpërmjet tre strategji kryesore për të kapërcyer rrënjët e migrimit:
- Projekti rrit aftësinë e punësimit të njerëzve nëpërmjet trajnimeve të specializuara që përshtaten me kërkesat e tregut të punës. Nëpërmjet mbështetjes së vërtetë për mikro-sipërmarrjet, ai u mundëson individëve të krijojnë burime të ardhurash dhe të përparojnë ekonomikisht në vendlindje. Fokusi vihet në sektorë me potencial të lartë për rajonin, si (agro)turizmi, bimët mjekësore dhe aromatike, përpunimi i përmirësuar i produkteve bujqësore dhe shërbimet e bazuara në TIK.
- Projekti punon drejtpërdrejt me të rinjtë dhe familjet për të kuptuar dhe adresuar arsyet e thella që i shtyjnë ata të migrojnë. Përmes informimit dhe fuqizimit, ai ndihmon në rritjen e rezistencës ndaj presioneve të jashtme. Një element kyç është paraqitja e realitetit të jetës së emigrantëve në Britani, si dhe tregimet inkurajuese të atyre që kanë zgjedhur të ndërtojnë një jetë të denjë në Kukës, Has, Tropojë dhe Dibër.
- “Perspektiva të Reja” bashkëpunon ngushtë me qeveritë lokale dhe kombëtare për t’i dëgjuar zërin e qytetarëve dhe të biznesit, duke i shtyrë autoritetet të jenë më transparente dhe të përgjegjshme. Projekti ofron asistencë teknike për të ndihmuar bashkitë në krijimin e një mjedisi shoqërues për zhvillimin ekonomik, duke shfrytëzuar plotësisht potencialin njerëzor të veriut.
“Perspektiva të Reja” është një investim strategjik për një të ardhme të qëndrueshme për veriun e Shqipërisë. Duke trajtuar shkaqet rrënjësore të migrimit të parregullt, projekti ofron një alternativë reale: mundësinë që të rinjtë të shohin shtëpinë e tyre veriore jo si një vend nga duhet të ikin, por si një hapësirë ku mund të ndërtojnë jetën e tyre me dinjitet dhe shpresë. Nëpërmert kësaj përpjekjeje të koordinuar, Hasi, Kukësi, Tropoja dhe Dibra synojnë të shkruajnë një kapitull të ri, të fokusuar në zhvillim dhe oportunitet. Diaspora Hasjane e mbështet këtë nismë dhe pret me shumë interes rezultatet e pritshme.
